Eduardo Baamonde percorre en acuarelas as comarcas do Eume, Ferrol e Ortegal rexistrando as súas vilas (Pontedeume, Redes, Mugardos, Cedeira, O Barqueiro, Ortigueira, etc.), as súas paisaxes naturais (Fragas do Eume, Estaca de Bares, Valdoviño, etc.) e o seu variado legado histórico (Caaveiro, Moeche, Xubia, etc.), deténdose especialmente na riqueza urbanística e patrimonial que ofrece a cidade de Ferrol. Como noutras ocasións, conviven as estampas máis coñecidas con recunchos menos visitados, compondo un panorama completo desta singular zona de Galicia.